formation courte en breton
Ur staj "deskiñ dre ober" : treiñ diwar ar saozneg, embann hag enrollañ
Stummadur « dre ober » nevez gant Blaz Bazhvalan :
Treiñ, embann hag enrollañ ur pezh-c’hoari a-stroll
DIWAR AR SAOZNEG E BREZHONEG
PERAK :
Un ezhomm bras a droidigezhioù faltazi e brezhoneg : n’eo ket ledan awalc’h ar grouidigezh e brezhoneg evit magañ c’hoant lenn a dud, hini ar re yaouank dreist-holl.
Troidigezhioù diwar yezhoù all kentoc’h eget diwar ar galleg : perak ta ? da gentañ peogwir ne vo ket sachet an dud gant skridoù a zo anezho dija e galleg, hag ivez peogwir eo buhezekoc’h ar grouidigezh faltazi er broioù estren.
Kregiñ gant ar saozneg : ledan an dibab, niverus awalc’h ar vrezhonegerien barrek war ar saozneg ha gouest da dreiñ war-eeun diwarnañ ha n’eo ket dre hanterouriezh ar galleg.
Diwar barregezhioù ar vro, sevel ur skipailh a droourien dre deskiñ labourat hag en em wellaat a-stroll a-benn bastañ d’an ezhommoù da zont.
Mont pelloc’h gant ar skrid troet
Pal ar staj eo mont deus an eil penn d’egile gant ur skrid : kavout ur skrid, treiñ anezhañ, kavout un embanner, lakaat embann ar skrid war baper koulz ha war ar rouedad.
Gant ar skrid e c’heller ivez mont pelloc’h : mouezhiañ anezhañ ha deskiñ sevel ur gwir labour radio.
Anv zo neuze da gas da benn labourioù « real life », gant disoc’hoù resis da vezañ tizhet gant ar stajidi.
PENAOS :
Dibab ur skrid : romant, danevell, barzhoniezh, pezh-c’hoari ?
Labouret e vo war ur pezh-c’hoari kinniget deomp gant ar skrivagner iwerzhonat Gerry MacDonnel, Making it Home e anv, unan na re verr na re hir, gant div dudenn, a zere mat da seurt stummadur.
Un tañva eus Making it Home e saozneg (tamm kentañ) :
Mont en-dro ar staj treiñ :
Daou zevezh labour gant ul labour hiniennel en araok, ha labour a-stroll etre an daou brantad ha goude.
- Dibab ar stajidi, kas ar skrid dezho da lenn, dezho da stagañ gant an droidigezh, merzhout ar poentoù diaes, soñjal en doare da gas al labour da benn : betek gwengolo 2011
- Devezh kentañ : boulc’hañ mat an droidigezh : Here 2011
- Miz labour : labour a-stroll dre ostilhoù internet : Du 2011
- Eil devezh : sevel an destenn, da vezañ peurechuet ha peurlipet ba’r ger goude : Kerzu 2011
- Embann ar pezh : deroù 2012
DEUS AR SKRID D’AR SON
Evit mont pelloc’h e kinnigomp stummañ ar pezh-c’hoari evit ar radio
Ur staj distag e vo, digor d’an droourien evel-just met ivez da dud all a fell dezho deskiñ mouezhiañ skridoù ha frammañ ur gwir abadenn radio, a vo skignet war-lerc’h war RCF-Radio an Aodoù.
Pal ar jeu neuze eo tapout barregezhioù a c’hello servij dezho diwezhatoc’h.
Un dibenn-sizhun vo lakaet e miz Genver 2012 evit kas al labour-se da benn
- deskiñ komz er mikro, reiñ ton d’ar vouez
- deskiñ gwiskañ un enrolladenn gant muzik ha trouzoù
(labouret e vo e studio RCF Brest evit an enrolladennoù ha war ar poellad Audacity evit ar frammañ, ur benveg simpl, digoust, hag a gerzh war PC koulz ha war Mac)